A profesora Carmen Álvarez ingresa na Academia de Farmacia de Galicia
A profesora do Departamento de Farmacia e Tecnoloxía Farmacéutica da USC Carmen Álvarez Lorenzo ingresará este mércores 30 como Académica de Número na Academia de Farmacia de Galicia. A cerimonia protocolaria dará comezo ás 19.00 horas na sede da Academia (antigo Hospital de San Roque, r/ San Roque, 2) e nela pronunciará o discurso ‘Medicamentos e produtos sanitarios integrados nun só sistema. Oportunidades e retos’. Premio extraordinario de Licenciatura e Doutoramento, Carmen Álvarez realizou unha estadía entre 1998 e 2001 no Departamento de Física e Centro para Ciencia e Enxeñaría de Materiais no Instituto Tecnolóxico de Massachusetts (MIT). De volta en España, incorporouse como investigadora do Programa Ramón y Cajal ao Departamento de Farmacia e Tecnoloxía Farmacéutica da USC, no que é profesora titular dende 2007. No ano 2011 a profesora Álvarez Lorenzo obtivo a acreditación para acceder ao corpo de catedráticos de universidade. Dentro do grupo de investigación I+D Farma as súas liñas de traballo céntranse no deseño de novos sistemas poliméricos para aplicacións biomédicas e farmacéuticas. Os seus traballos abordan os sistemas nanométricos e nanoestruturados para solubilización, estabilización e vectorización de fármacos e material xenético, os entramados sensibles a estímulos e capaces de recoñecer moléculas selectivamente, os sistemas biomiméticos, os implantes inxectables para medicina rexenerativa e as lentes de contacto e outros produtos sanitarios funcionalizados para carga e cesión de fármacos ou para previr a formación de biofilm microbiano. En conxunto, trátase dunha actividade investigadora desenvolvida dun xeito pluridisciplinar en colaboración con grupos europeos, americanos e xaponeses. No eido da produción científica, Carmen Álvarez é autora de mais de 200 artigos en revistas internacionais, 30 capítulos de libro e máis de 200 comunicacións a congresos, o que se reflicte nun índice h de 37 (Web of Science). Ten coeditado os libros Handbook of Molecularly Imprinted Polymers de Smithers Rapra Publisher UK (2013) e Smart Materials for Drug Delivery da Royal Society of Chemistry UK (2013). Investigadora en 15 proxectos financiados por axencias nacionais, fundacións e empresas, é ademais autora de 13 patentes. Revisora de artigos en medio centenar de revistas de alto índice de impacto, avaliadora de proxectos da ANEP e de diversas axencias autonómicas e de países europeos e americanos, a profesora da USC forma parte do comité editorial de revistas internacionais, entre elas o Journal of Pharmaceutical Sciences (USA), e é editora asociada de Recent Patents on Nanomedicine.
Ata o momento dirixiu trece teses de doutoramento e supervisa outras sete. Igualmente titoriza estudantes de grao, doutoramento e a investigadores posdoutorais procedentes de universidades como Calabria, Gante, Coimbra, Minho, Islandia, UNAM, Bos Aires, Mar da Prata ou Veer Narmad South Gujarat.