O Consello de Goberno aproba a proposta de orzamentos da USC para 2016
O orzamento da USC para 2016 ascenderá a 219,29 millóns de euros, segundo o documento aprobado este xoves polo Consello de Goberno e que agora deberá someterse á aprobación do Consello Social. En termos cuantitativos, a proposta presenta un incremento de 5,42 millóns respecto da proposta de liñas xerais de orzamento presentadas ao Claustro. O incremento débese á recepción, con posterioridade ao debate no Claustro, do convenio coa Xunta para a determinación do financiamento da USC no marco do Plan Galego de Financiamento Universitario 2016-2020, que modificou á alza as previsións de recursos afectados, así como á notificación dunha nova axuda do Ministerio de Economía e Competitividade e outros axustes derivados do debate no Claustro.
Este será o segundo orzamento da USC que aplica o Plan Económico-Financeiro de Reequilibrio, “ necesario para absorber o déficit acumulado pola institución e asegurar, dentro do equilibrio orzamento esixido pola lexislación vixente, a súa capacidade para reintegrar a débeda a longo prazo asumida co Estado e coas entidades bancarias derivadas das súas políticas de investimento”, se explica no documento aprobado. Ademais, o exercicio de 2016 será o primeiro incluído no Plan Galego de Financiamento Universitario (2016-2020).
O Consello de Goberno tamén aprobou a proposta de nomeamento como profesorado/persoal investigador ad honorem para este curso de José Carlos de Miguel, Felipe Arias, Javier Bullón e de Carlos Hernández Sande, así como a prórroga desta condición para Juan Manuel Antelo Cortizas, José Manuel Domínguez Castiñeiras, Agustín Dosil Maceira, Alfonso Castiñeiras Campos, Fernando Alonso Romero, Sergio Casas Fernández, Arturo Pombo Arias, Mª do Carme García Negro, Eduardo Moreno Piquero, José Emilio Mora Bermúdez, Max-Jean Zins, Francisco Díaz-Fierros Viqueira, Ángel S. Porto Ucha, Andrés J. Precedo Ledo, Emilio Villanueva Nóvoa, Mercedes Casal Jiménez, José Sordo Rodríguez, Jaime Toribio Pérez e José M. Gándara Rey.
Orde do día
Outros asuntos incluídos na orde do día desta xuntanza do Consello de Goberno da USC foron os programas de xestión integrada de investigación, a modificación da RPT de PAS ou a adscrición de materias a áreas de coñecemento, así como o Regulamento de tramitación das titulacións de grao e máster oficial, prazas de PDI, os criterios e calendario para a presentación de novas propostas de títulos oficiais e programas de doutoramento e modificacións dos existentes, a modificación do Grao en Lingua e Literatura Galegas ou a aprobación de memorias de cursos de posgrao propios.
Completaron a orde do día, a determinación de prezos públicos e retribución máxima de docentes para cursos de posgrao propios e formación continua do curso 2016-2017, a convocatoria de bolsas de comedor do SUR, a modificación do Regulamento Electoral Xeral da USC ou a creación das cátedras Cruz Roja Española e de Enfermidades Metabólicas Hereditarias, entre outros.