InvestigArte inaugura unha exposición coas mellores obras recibidas na segunda edición

O concurso Investigarte inaugura este martes 8 unha exposición coas 30 mellores obras presentadas á segunda edición desta convocatoria, seleccionadas de entre as máis de 250 propostas realizados por científicos e estudantes de ESO, Bacharelato e Formación Profesional co obxecto de mostrar de xeito visual aspectos científicos e tecnolóxicos. O obxectivo desta convocatoria era, a través da imaxe, explicar ás novas xeracións e á sociedade en xeral o alcance das innovacións científicas e tecnolóxicas asociadas a proxectos de investigación. O acto inaugural da exposición así como a entrega de premios terá lugar este martes 8 ás 19.00 horas na Sede da Fundación Araguaney-Puente de Culturas no Hotel Eurostars Araguaney, coa presenza do vicerreitor de Investigación e Innovación, Francisco González; da directora da Fundación Ramón Dominguez, María Gómez-Reino; e do director xeral da Fundación Barrié, Javier López Martinez. A exposición co conxunto das obras estará aberta ao público ata o próximo 2 de maio na Fundación Araguaney, de luns a sábado de 11.00 a 14.00 e de 18.00 a 20.30 horas. Posteriormente, poderá visitarse nas instalacións da Fundación Barrié en Vigo o próximo curso escolar 2014-2015. InvestigArte está organizado polo Campus de Excelencia Internacional da USC, Campus Vida; educaBarrié (a canle de comunicación coa comunidade educativa da Fundación Barrié); o Instituto de Investigacións Sanitarias de Santiago (IDIS); e a Fundación Ramón Domínguez (do Complexo Hospitalario Universitario de Santiago). Na presente edición, a colaboración coa asociación ARSCIENCIA, tamén permitiu estrear unha categoría dirixida a profesores na que se valora a capacidade de involucrar ao alumnado na aprendizaxe de coñecementos científicos-tecnolóxicos por medio da arte ou viceversa Visitas guiadas De xeito paralelo coa exposición, InvestigArte organizará visitas guiadas para rapaces e rapazas de centros escolares de luns a sábado, entre as 11.00 e as 12.30 horas, a quen acompañarán alumnado da USC de graos afíns aos temas propostas (Bioloxía, Pedagoxía,...) en calidade de guías. Nestas visitas explicaranlle o obxecto desta iniciativa e o fío condutor que une as obras expostas para así conectar os traballos coa ciencia que se realiza día a día nos laboratorios. Ademais, prepararán unha actividade didáctica en forma de pequeno experimento. Para estas visitas de grupos será preciso formalizar a reserva no teléfono 981.559.612. Segundo os seus promotores, a edición de 2013/2014 foi todo un éxito tanto a nivel de participación por investigadores e escolares, como a nivel mediático a través da súa páxina web, www.investigarte.es. Ademais, a presente edición conseguiu tanto, dobrar os niveis de participación e visitas web coma expandirse a nivel nacional e internacional, o que “indica un claro afianzamento da iniciativa”. A seguinte fase da vixente edición será mostrar todos estes traballos a través de exposicións itinerantes que percorrerán a xeografía galega. Como xa sucedera coa primeira edición, a colaboración con educaBarrié permitirá que a mostra se achegue a un gran número de colexios de toda Galicia, para o que é preciso solicitala na web www.educabarrie.org. InvestigArte Esta é unha iniciativa que xurde a partir dun grupo de investigadores novos que, a través dun concurso científico-visual, buscan dar a coñecer a investigación que se está realizando na actualidade e como esta repercutirá no benestar da poboación. “A ciencia é un alicerce importante para a mellora da calidade de vida das persoas así como para fortalecer a economía dos países”, sinalan os seus promotores. Neste senso, InvestigArte tenta desenvolver novas canles de comunicación na difusión da ciencia, “en tanto que realidade pouco coñecida para o gran público” propiciando o achegamento dos grupos de investigación e os seus resultados á sociedade. Como apuntan os seus responsables, o concurso traza unha vía para facer chegar á cidadanía dun xeito claro e mesmo palpable a significación e o alcance do traballo realizado en laboratorios e centros de investigación, resaltando a relación directa existente entre progreso e ciencia. InvestigArte volverá abrir unha nova convocatoria a partir de Novembro deste ano, na que os investigadores de Hoxe e do Mañá poderán volver a ofrecernos a súa visión do mundo da ciencia e a tecnoloxía.