Estudantes de Formación de Profesorado desenvolven material didáctico para a aprendizaxe de persoas cegas
A Facultade de Formación de Profesorado do Campus de Lugo acolleu este martes o acto de entrega á delegación da Organización Nacional de Cegos (Once) en Lugo de diverso material didáctico específico para persoas con diversidade funcional deseñado e elaborado por alumnos/as dos graos en Mestre/a de Educación Infantil e Mestre/a de Educación Primaria, baixo a coordinación de dúas mestras especializadas en cegueira e discapacidade visual.
As diferentes maquetas bi e tridimensionais e os contos táctiles infantís, con escritos en galego español utilizando código Braille, realizados por estudantes dos graos de Mestre en Infantil e Primaria na facultade luguesa, antóllanse como un material de gran utilidade para traballar de xeito específico con persoas cegas ou con discapacidade visual, segundo puxo de manifesto o decano da Facultade de Formación de Profesorado de Lugo na cerimonia de entrega deste vistoso material didáctico. Francisco Rodríguez Lestegás sinalou que o desenvolvemento destas ferramentas educativas moi acaídas para persoas cun diversidade funcional específica como é a discapacidade visual ou a cegueira, encádrase no marco de colaboración que mantén a Facultade de Formación de Profesorado de Lugo coa Organización Nacional de Cegos de España (ONCE) en aras a mellorar e avanzar no que atinxe á atención á diversidade no plano educativo. A atención ás persoas con diversidade funcional é unha das premisas que está presente de xeito transversal na formación dos futuros mestres, especialmente a través de dúas materias que afondan especificamente nesta tarefa: Dificultades de aprendizaxe e trastornos de desenvolvemento e Escola inclusiva e necesidades educativas especiais, salientou Rodríguez Lestegás. Este preocupación, engadiu o decano, reforza ademais a convicción de que todas as persoas poden aprender, polo que os profesionais encargados da súa educación deben contar cos recursos necesarios para axudarlles neste proceso de aprendizaxe. O director da delegación lucense da Once, Roberto Doval Sánchez, acompañou ao decano da Facultade de Formación de Profesorado de Lugo no acto durante o que se formalizou a entrega á Once de todo o material realizado polos estudantes, unha sesión desenvolvida nun salón de actos ateigado de universitarios/as e que contou tamén coa participación das dúas profesoras especialistas en traballar con persoas cegas ou con discapacidade visual e que foron as que supervisaron a elaboración dos contos táctiles infantís e tamén das distintas maquetas bi e tridimensionais.