Continúa o período de horarios extraordinarios nas bibliotecas da USC durante a época de exames

Continúa o período de horarios extraordinarios da rede de Bibliotecas da USC coincidindo coa época de exames co obxectivo de optimizar a oferta de postos adecuándoos á demanda existente. Esta programación extraordinaria estivo negociada con representantes do alumnado para fixar os centros e horarios de apertura destes en calendario extraordinario, tendo en conta o calendario de exames e a experiencia de anos anteriores. A Sala de Lectura da Facultade de Farmacia continuará aberta as 24 horas do día ata o 11 de xullo e a Biblioteca Intercentros de Lugo e a Biblioteca Concepción Arenal realizarán horarios especiais durante o período de exames. Así estes centros permanecerán abertos de 8.30 a 3.00 da madrugada de luns a venres, retrasándose a apertura ata as 10.00 horas as fins de semana e festivos. Co comezo do mes de xullo a apertura de Intercentros e Concepción Arenal retrasarase ata as 9.00 da mañá e a partir do día 7 de xullo só o centro lugués permanecerá aberto ata as 3.00 da madrugada, mantendo a Sala de Lectura de Farmacia o seu horario de apertura de 24 horas. Nos restantes puntos de servizo da Biblioteca Universitaria manterase o horario habitual. Máis de 6.500 postos As bibliotecas da USC manteñen un horario habitual dende as 8.30 horas da mañá ata as 21.30 da noite de luns a venres cunha oferta de 6.593 postos de lectura individuais, rexistrando a maior ocupación durante os meses de maio, xuño e xullo, motivo polo que se amplían os horarios. Este servizo universitario abre unha media de 226 días ao ano e 74 horas á semana. As Bibliotecas Concepción Arenal (Santiago) e Intercentros (Lugo) superan esta cifra con 354 días ao ano e 98 horas semanais de apertura o que garante a oferta permanente de espazos para o estudo na USC.