A violinista Beatriz Junco e González Permuy, ao piano, interpretan o xoves na Casa do Saber as sonatas nº2, nº5 e nº10 de Beethoven

A violista Beatriz Junco, acompañada ao piano de Alicia González Permuy, interpretarán este xoves, 28 de febreiro, no auditorio da Casa do Saber da Vicerreitoría de Coordinación e Planificación do campus de Lugo, as sonatas número 2, 5 e 10 do xenial compositor alemán.

Este concerto, o penúltimo dos programados no marco do ciclo ‘Sonatas para violín e piano de Beethoven’, organizado oa abeiro do convenio Lugo Cultural, desenvolverase a partir das 20.00 horas, no auditorio da Casa do Saber. A entrada é de balde para todos os asistentes ata completar o aforo. A traxectoria musical destas dúas intérpretes vén avalada pola súa ampla e contrastada formación artística. A violinista Beatriz Junco, na actualidade alumna da Escola de Altos Estudos Musicais de Galicia (EAEM), dirixida polo tamén violinista Grigori Nedobora, tamén tivo como instructores a V.Podhraskà, F.Vlashi e T.Janikashvili, que coidaron a formación musical desta violinista nunha primeira estapa, antes de que se trasladara á Hochschule für Musik de Frankfurt, onde se especializou con Walter Forchert. Un currículo semellante ao de Junco é o que avala a traxectoria e a formación musical da pianista Alicia González Permuy, quen, entre os seus mestres, contou con J. Mora ou A Attenelle. González Permuy asistiu tamén a cursos con M.Carra, I.Zariskaya, J.Colom y A. Cano, ademais de facer un posgrao en piano e música de cámara con T. Demmers e J. E. Lluna no Brabants Conservatorium de Tilburg, en Holanda.

A virtuosa pianista Alicia González Permuy completou a súa formación musical en másteres clases con músicos como J.E.Lluna, J.L.Estellés ou W.Boeykenks, ao tempo que desenvolveu cometidos profesionais en lugares da altura do Musikverein de Viena.