Ábrese a votación para elixir os mellores modelos 3D realizados por escolares cos seus móbiles

A Universidade de Santiago de Compostela vén de abrir o prazo para votar os mellores modelos 3D de precisión desenvolvidos polos escolares de todo o país cos seus respectivos teléfonos móbiles no marco da D3mobile Metrology League, un campionato científico promovido polo grupo de investigación USCAN3D da USC en colaboración coa Fundación Española para a Ciencia e a Tecnoloxía e outras entidades públicas e privadas.

Este proceso de votación pública dos modelos 3D de precisión feitos por escolares está aberto a todo o público interesado, que poderá emitir a súa cualificación ata o vindeiro 16 de xuño a través da páxina web www.de3mobile.es. Os votos emitidos polo público serán os que determinen os gañadores da primeira edición deste campionato, que persigue fomentar as vocacións científicas entre os escolares. Asemade, todos os participantes nas votacións participarán no sorteo dun i-Pad, así como doutros agasallos tecnolóxicos. A D3mobile Metrology League permitiu aos estudantes de 4º da ESO e de BAC que tomaron parte neste campionato aprender a desenvolver modelos 3D de precisión cos seus móbiles a través de e-learning. Este programa formativo tamén achegou aos escolares as ferramentas precisas para investigar e descubrir cómo obter bos resultados métricos e visuais, segundo sinalou o coordinador deste proxecto e membro do grupo de investigación Uscan3d da USC, Juan Ortiz.

Este profesor da Escola Politécnica de Lugo salientou asemade que o feito de someter os traballos dos/as estudantes ao ditame da opinión pública é unha forma de achegar a ciencia aos cidadáns, facéndoos partícipes dun campionato que ten a investigación como protagonista. Ortiz indicou asemade que este exercicio de divulgación permite aos participantes descubrir cómo un traballo de investigación ben feito pode levalos/as ao éxito, ao tempo que reporta certo recoñecemento social para os autores dos proxectos mellor valorados.