A Politécnica entrega este xoves as insignias e Premios Fin de Carreira aos novos enxeñeiros técnicos agrícolas

A Escola Politécnica Superior do campus de Lugo acollerá o xoves 30 de maio de 2013 a entrega de insignias e Premios Fin de Carreira aos novos enxeñeiros técnicos agrícolas titulados no transcurso dun acto académico que se celebrará, a partir das 12.00 horas, no salón de actos do centro universitario lugués.

O vicerreitor de Coordinación e Planificación do campus de Lugo, Pedro García Herradón, será o encargado de abrir o acto, no que tamén intervirán o director da Escola Politécnica do campus de Lugo, Javier Bueno Lema; o presidente do Colexio Oficial de Enxeñerios Técnicos Agrícolas de Lugo, Armando Rey Rodríguez, e o presidente do Colexio Oficial de Enxeñeiros Técnicos Agrícolas de A Coruña e Pontevedra, Rafael José Muiños Moreno. O secretario Xeral do Consello Xeral de Enxeñeiros Técnicos Agrícolas de España, Ignacio Hernando Sotillo, será o encargado de ofrecer o relatorio no marco deste acto académico, unha intervención que se desenvolverá baixo o título ‘Do perito agrícola ao graduado en Enxeñaría Agrónomica’. Unha vez rematada a quenda de intervencións previstas, os membros da mesa procederán á entrega de insignias aos novos enxeñeiros técnicos agrícolas titulados, así como os Premios Fin de Carreira aos autores dos mellores proxectos. Ao remate, a Escola Politécnica Superior convidará a todos os asistentes a un viño na cafetería do centro.