O Museo do Templo de Mitra abre as súas portas ao público

O Museo do Templo de Mitra permanece aberto ao público desde este luns, logo do acordo alcanzado entre o Concello de Lugo e a Universidade de Santiago de Compostela para amosar a todas as persoas interesadas o xacemento romano achado nas escavacións feitas no solar sobre o que se asenta a Casa do Saber de Lugo.

O horario de visitas guiadas ao Museo do Templo de Mitra acordado para o mes de xullo será de luns a venres e en quenda de mañá. O arqueólogo Celso Rodríguez Cao será o encargado de explicar aos visitantes os segredos que esconde este xacemento arqueolóxico. As horas establecidas inicialmente para facer este percorrido guiado son ás 11.00, 12.00 e 13.00 horas.

As visitas a este museo lugués recentemente inaugurado terán continuidade durante o mes de agosto, cando o público interesado poderá visitar este museo dous días, preferentemente concentrados cara a fin de semana (venres e sábado ou sábado e domingo), tamén en horario de mañá.