A Universidade de Santiago avanza na administración electrónica

A Universidade de Santiago acaba de poñer en funcionamento a súa Sede Electrónica, unha oficina virtual de atención a usuarios/as en Internet a calquera hora, todos os días do ano. A Sede diríxese a membros da comunidade universitaria e á cidadanía que desexen realizar as súas xestións coa USC a través de Internet coa mesma validez que de xeito presencial. Funcionará de conformidade cos principios de responsabilidade, integridade, accesibilidade, seguridade, veracidade, calidade e actualización de información e servizos. Como explicou o reitor Juan Casares na presentación da Sede, este é un novo fito acadado pola institución universitaria na súa longa traxectoria de mellora dos servizos que ofrece á cidadanía mediante a aplicación das tecnoloxías na mellora dos procesos de administración e xestión universitaria. Deste xeito, a Sede Electrónica súmase a outras iniciativas como a matrícula por internet, as actas asinadas electronicamente ou a emisión de certificacións automatizadas, entre outros exemplos. Coa implantación da sede electrónica, a Universidade compostelá pretende facilitar o acceso aos seus servizos ao tempo que crear un espazo de relación coa cidadanía no marco dunha xestión administrativa coas garantías necesarias, diferenciando o concepto de portal de comunicación do de sede electrónica. Na liña do esixido pola Lei 11/2007, a Sede Electrónica unifica e facilita o acceso e difusión cara á cidadanía de todos os servizos que a USC pon á súa disposición, respondendo ao dereito dos/as usuarios/as a poder relacionarse electronicamente coas administración públicas. Así, o portal www.usc.es ten un compoñente institucional, de información xeral sobre a Universidade, mentres que a sede electrónica establece un marco de comunicación e interacción coa cidadanía en relación cos servizos electrónicos prestados pola Universidade. Esta posta en marcha enmárcase dentro do Plan de Implantación da Administración Electrónica na USC que concreta un calendario de actuacións para os próximos dous anos de xeito que en setembro de 2015 estean accesibles á cidadanía todos os procedementos. A través da Sede Electrónica accederase á información dos procedementos, realización de trámites, presentación de documentos no rexistro electrónico, formulación de queixas e suxestións, consulta do taboleiro de anuncios da USC ou verificación de documentos electrónicos expedidos pola Universidade. Para completar o conxunto, o certificado da Sede garante o acceso aos seus contidos con seguridade. O catálogo de produtos inicial que ofrece a USC en formato de administración electrónica inclúe procedementos para persoal docente e investigador e de administración e servizos, estudantado e cidadanía en xeral que poderá acceder á solicitude de certificacións automatizadas no ámbito da Oficina de Investigación e Tecnoloxía e a procedementos no ámbito da Xestión Académica (admisión para realizar estudos, expedientes académicos, recoñecemento de estudos, cambios ou certificacións e acreditacións, entre outros). Para o vindeiro mes de setembro estase a traballar na inclusión dun segundo bloque de procedementos xa identificados e inventariados sobre admisión ou continuación de estudos, matrícula, prezos públicos, títulos ou expedientes académicos e outros procedementos de carácter transversal. O órgano responsable da xestión e seguridade da Sede Electrónica corresponde á Secretaría Xeral, que tamén coordinará e supervisará a implantación das medidas xurídicas, tecnolóxicas e administrativas que sinala a Lei 11/2007 de acceso electrónico dos cidadáns aos servizos públicos, o regulamento propio da USC e as resolucións posteriores que se diten. Na presentación da Sede Electrónica da USC acompañaron ao reitor a vicerreitora de Responsabilidade Social e Calidade, Benita Silva; a secretaria xeral, Lourdes Noya; a xerenta, Lourdes Batán; e o director da Área TIC, Andrés Freire.