Entrega de diplomas a estudantes do IES Vilar Ponte de Viveiro que participaron no programa ECO-FA-SE desenvolvido pola USC

O vicerreitor de Coordinación e Planificación do campus de Lugo, Pedro García Herradón, participará no acto de clausura e entrega de diplomas aos estudantes do IES Vilar Ponte, de Viveiro, que participaron no programa ECO-FA-SE, desenvolvido polo grupo de investigación da Universidade de Santiago de Compostela Esculca, que dirixe o profesor Miguel Ángel Santos Rego. Os promotores deste programa orientado a mellorar o rendemento educativo dos alumnos/as de ESO e no que participaron 269 estudantes de sete centros educativos de Galicia con diversidade cultural entre o seu estudantado, elixiron o IES Vilar Ponte de Viveiro para a celebración deste acto, que se desenvolverá a partir das 20.30 horas, pola “total implicación dos 16 estudantes adheridos ao programa, así como pola participación dos pais e nais e pola colaboración e implicación do profesorado do centro”, segundo salientou a profesora e investigadora da Universidade de Santiago, Mar Lorenzo Moledo. Os 16 alumnos/as do IES Vilar Ponte enrolados no programa ECO-FA-SE recibirán cadanseu diploma acreditativo da formar parte deste programa de investigación da Universidade de Santiago que se agarda teña continuidade o vindeiro curso académico. O alcalde de Viveiro, Melchor Roel; o director do IES Vilar Ponte, Marcelino García, e o responsable do programa ECO-FA-SE, Miguel Ángel Santos Rego, ademais doutros investigadores da USC e do profesorado do centro educativo viveirense, acompañarán ao vicerreitor de Coordinación e Planificación do campus de Lugo, neste acto de peche do ECO-FA-SE.

Os institutos de ensino secundario Xulián Magariños (Negreira), Xoán Montes (Lugo), Sanxenxo (Pontevedra), Pino Manso (Porriño), Lagoa de Antela (Xinzo de Limia) e o CPR Fogar Santa Margarida, de A Coruña, son, xunto co IES Vilar Ponte de Viveiro os centros educativos que participaron no presente curso 2012-13 no programa ECO-FA-SE.