A ACSUG organiza en Lugo un seminario de formación de avaliadores da calidade universitaria

A Axencia para a Calidade do Sistema Universitario de Galicia (ACSUG) organiza os días 26 e 27 de setembro na Facultade de Veterina do Campus de Lugo o seu segundo Seminario de Formación de Avaliadores, co obxectivo de dar a coñecer os procedementos de avaliación da calidade do profesorado e das ensinanzas universitarias. O curso vai dirixido tanto a alumnos e profesores da comunidade universitaria como aos profesionais dos distintos sectores empresariais que poidan estar interesados en participar nos procesos de avaliación externa. A avaliación da calidade universitaria realízase a través de axencias (neste momento existen 10 a nivel nacional, unha delas en Galicia) que nos seus procesos avaliadores contan coa colaboración de diversos colectivos, tanto internos como externos ao ámbito universitario, aos que a ACSUG achega a formación necesaria a través destes encontros. A inauguración oficial do curso terá lugar o mércores 26 de setembro, ás 10.00 horas, e contará coa presenza do vicerreitor de Coordinación e Planificación do Campus de Lugo, Pedro García Herradón; o conselleiro de Educación e Ordenación Universitaria, Xesús Vázquez Abad; o secretario Xeral de Universidades, José Alberto Díez de Castro; a presidenta da ACSUG, a profesora da USC Patrocinio Morrondo Pelayo; e o director da ACSUG, José Eduardo López Pereira. A partir de relatorios e mesas redondas, o encontro desenvolverá aspectos como o papel da ACSUG nos diferentes programas de avaliación, os puntos fortes e febles nos procesos avaliadores, a visión dos avaliadores externos, a verificación dos títulos oficiais, a acreditación do profesorado, o seguimento de títulos oficiais ou os complementos de excelencia curricular.