O Forum Ciceron 2011 busca aos 48 mellores universitarios galegos
O Forum Ciceron 2011 reunirá durante tres días do vindeiro mes de abril a universitarios e empresas no marco dun encontro no que os posibles empregadores poderán observar de primeira man as competencias e habilidades dos mellores alumnos das universidades galegas. Baixo o lema ‘Se busca talento’, o Forum Ciceron 2011 presentouse este luns 31 na Casa Europa da USC coa presenza do reitor da Universidade de Santiago, Juan Casares; do director xeral de Promoción do Emprego, Andrés Hermida; e o director xeral do IGAPE, Joaquín Varela; e os integrantes de Qcoach, Daniel Álvarez e Santiago Martínez. Segundo se puxo de manifesto na manifestación, ‘Se busca talento’ está concibido como un proceso organizado de competición en equipo sobre a arte do debate que reunirá aos universitarios con máis talento. Ademais e segundo os seus organizadores, o Forum é unha ferramenta de grande utilidade para poñer en contacto a futuros empregados e empregadores cunha efectividade superior aos tradicionais procesos de selección de persoal, xa que o proceso permite simular como se comportan os candidatos nun contexto de tensión competitiva. Logo desta presentación ábrese agora a primeira fase da actividade na que se seleccionarán aos 48 mellores alumnos universitarios de Galicia. As persoas interesadas deben enviar un correo electrónico antes do 15 de marzo de 2011 a forumciceron [at] sebuscatalento.es (forumciceron[at]sebuscatalento[dot]es) adxuntando o currículo vitae, un expediente académico selado pola universidade correspondente e unha carta de motivación explicando brevemente as razóns para participar na convocatoria. Poderán participar nesta iniciativa de recruiting universitario alumnos das tres universidades galegas que estean a cursar o último ano da carreira no presente curso ou que se licenciaran en 2009-2010. Os seus promotores sinalan esta iniciativa como unha oportunidade de formación extra académica útil para a busca do primeiro emprego e para o futuro desenvolvemento profesional. Ao mesmo tempo, trátase dunha oportunidade para que as empresas máis importantes poidan observar o talento dos participantes.
A actividade inclúe unha segunda fase a celebrar os días 6 e 7 de abril na Illa de San Simón na que os universitarios recibirán formación específica para transformar as súas destrezas persoais previas nas competencias necesarias para a súa andadura profesional. O Forum concluirá o 8 de abril coa disputa do Torneo de Debate ‘Se busca talento’ no Parlamento de Galicia.