A Secretaría de Estado de Igualdade e a USC poñen en marcha Innovatia 8.3, un proxecto pioneiro en España para fomentar o emprendemento feminino

Fomentar o empresariado feminino no ámbito científico-tecnolóxico é o principal cometido do Proxecto Innovatia 8.3 que esta tarde presentaron en San Xerome o reitor da USC, Juan Casares, e a secretaria de Estado de Igualdade, Laura Seara. Trátase dun proxecto pioneiro no ámbito do estado español impulsado pola USC que pretende elaborar un Ecosistema de xénero do emprendemento baseado na tecnoloxía e o coñecemento. A partir da experiencia desenvolvida en Woman Emprende (USC), o obxectivo é crear un modelo de intervención que integre a perspectiva de xénero nos procesos de transferencia de coñecemento e de creación de empresas de base tecnolóxica. Comeza agora, a partir da sinatura do convenio, a fase de investigación e análise dos elementos clave nos que integrar a dimensión de xénero para así identificar perfís, fixar demandas e expectativas e poder perfilar proxectos potenciais. Unha vez realizado este pormenorizado estudo traballarase no Laboratorio Innovatia 8.3 para ofrecer ideas que poidan converterse en proxectos empresariais. Será na Aula Innovatia onde se produza a verdadeira transferencia de ideas e coñecementos, para o que se ofrece permanente apoio e titorización. Una vez que Innovatia 8.3 sexa experimentado e validado positivamente na USC transferirase a outras universidades e centros de investigación a través dun manual de implantación. Desta forma, o coñecemento xerado e adquirido redundará en resultados positivos inxentes sobre a innovación na sociedade. Pretendendo así eliminar a brecha de xénero que existe no ámbito empresarial, Innovatia 8.3 axudará á formación, captación e fidelización de talento feminino que desembarcará nun selo de calidade empresarial. Concretamente, o programa diríxese a fomentar o espírito emprendedor das licenciadas universitarias e apoiar a posta en marcha dos seus proxectos ligados a empresas spin-off. As mulleres na USC Preto do 65% do estudantado da USC son mulleres, e precisamente esta é a Universidade cunha porcentaxe de presenza feminina nos distintos grupos da comunidade universitaria superior á do resto do Estado. Contrariamente, no total de persoas promotoras de empresas apoiadas pola USC, un 26,6% son mulleres e un 77,4% homes. Concretamente, nun 45% dos proxectos empresariais só hai promotores masculinos e nun 24% máis o equipo promotor está formado maioritariamente por homes; mentres, só o 14% dos proxectos é exclusivamente de promotoras e nun 9% adicional a presenza é maioritariamente feminina. Á vista destes datos e para dar resposta á súa nova realidade sociolóxica, a USC decidiu hai poucos anos crear Woman Emprende, un programa pioneiro dedicado á muller universitaria emprendedora. Dirixido por Eva López, entre outros cometidos Woman Emprende estuda ese desequilibrio nas porcentaxes na busca de solucións e apoia ás mulleres emprendedoras da comunidade universitaria a través de múltiples accións.