Quince centros da USC obteñen o certificado de verificación dos seus Sistemas de Garantía Interna de Calidade

Os quince centros da USC que participaron na terceira convocatoria do Programa Audit obtiveron o certificado de verificación dos seus Sistemas de Garantía Interna de Calidade. Esta é unha convocatoria que organizan a Agència per a la Qualitat del Sistema Universitari de Catalunya, a Aneca e a Axencia para a Calidade do Sistema Universitario Galego (ACSUG). Nun acto celebrado na Universidade Politécnica de Catalunya, recolleu as certificacións de verificación a vicerreitora de Responsabilidade Social e Calidade, Benita Silva. Trátase dun recoñecemento ao deseño dos Sistemas de Garantía Interna de Calidade dos centros universitarios a través da avaliación da súa adecuación. Como se puxo de manifesto no acto de entrega, recoñécese así o compromiso das universidades e institucións de educacións superior coa promoción da calidade e fixación da calidade dos seus programas formativos. Os centros que obtiveron o certificado neste terceira convocatoria son as facultades de Bioloxía, Ciencias Económicas e Empresariais, Administración e Dirección de Empresas, Dereito, Física, Medicina e Odontoloxía, Química, Veterinaria, Xeografía e Historia, Óptica e Optometría, a Escola Politécnica Superior, e as escolas de Formación de Profesorado, Enfermaría (Lugo), Relacións Laborais (Santiago) e Traballo Social. Estes quince centros súmanse aos outros oito que superaron este trámite na segunda convocatoria do programa Audit, polo que un total de vinte e tres centros da USC xa dispoñen da certificación. Actualmente, outros cinco atópanse pendentes de verificación na cuarta convocatoria, cos que se completaría o conxunto de centros de Santiago e Lugo que obteñen a certificación.