Estudantes de Veterinaria de Lugo aprenderán a afrontar a súa primeira entrevista de traballo

Representantes da compañía de saúde animal ‘Merial’ impartirán este xoves 18 ás 19:00 horas no Salón de Actos da Facultade de Veterinaria de Lugo unha conferencia sobre as entrevistas de traballo no sector. A directora veterinaria e xefa de zona de ‘Merial’, Ana Belén Santos, e a delegada de ventas do laboratorio, Susana Flores Ferreiro, explicarán aos asistentes cómo afrontar a súa primeira entrevista de traballo ao tempo que analizarán os aspectos máis valorados polos empresarios á hora de contratar a un profesional veterinario.
Esta conferencia enmárcase dentro do ciclo ‘Compromiso das empresas coa formación do veterinario’ que se está a desenvolver na Facultade de Veterinaria dentro do programa de actividades para celebrar o seu 25 aniversario.
Os relatorios rematarán o vindeiro mes de abril coa participación de representantes das empresas como ‘Hill’s’ e ‘Esteve Veterinaria’, que abordarán os problemas de mobilidade nas mascotas e a subministración de anestesia nos pequenos animais.