Lugo acolle o día 30 a primeira carreira 'Dez quilómetros universitarios da USC-Campus de Lugo'

Centos de afeccionados ao deporte daranse cita en Lugo o domingo día 30 para participar na carreira ‘Dez quilómetros universitarios da USC- Lugo’ que se celebra por vez primeira na cidade.
Esta proba deportiva, organizada polo Servizo de Deportes da USC no campus lugués en colaboración do Concello de Lugo e a Deputación Provincial, encádrase na Liga Universitaria de carreiras en ruta de dez quilómetros que este ano xa celebrou probas nos campus de Vigo e Ferrol.
O evento presentárono este mércores en Lugo o vicerreitor de Coordinación do campus, Carlos Herrero; o vicepresidente primeiro da Deputación Provincial, Antón Bao; e o concelleiro de Deportes do Concello lugués, Xosé Manuel Díaz Grandío.
A probaA carreira ‘Dez quilómetros universitarios da USC-Campus de Lugo’ dará comezo ás 12:00 horas do domingo 30 de maio e desenvolverase nas inmediacións do recinto feiral e o Parque do Miño. Neste entorno, os participantes terán que dar tres voltas a un circuíto de herba, asfalto e terra.
‘Champion Chip Norte’ encargarase de cronometrar a proba, na que recibirán premios e trofeos os tres primeiros clasificados de cada sexo na clasificación xeral, así como os primeiros de cada sexo nas categorías de maiores de 35 anos e universitarios.
As persoas que desexen participar teñen que ser maiores de idade e poden formalizar a súa inscrición na páxina web www.championchipnorte.com ata as 14:00 horas do vindeiro martes día 25. O prezo é de tres euros para os membros da comunidade universitaria e de cinco para o resto dos participantes.
Esta proba completa a oferta deportiva na capital luguesa, que conta con citas moi asentadas no calendario do deporte galego, como é o caso das carreiras populares ‘Lugo Monumental’ ou o ‘Corre con nós’.