Matemáticos da USC estudan como mellorar o almacenamento xeolóxico de dióxido de carbono

Unha investigación dirixida polo profesor Alfredo Bermúdez de Castro aspira a optimizar mediante modelos numéricos o proceso de almacenamento xeolóxico de dióxido de carbono (CO2), cuxo aumento na atmosfera provoca o actual cambio climático.
Unha das estratexias en estudo para limitar o aumento do CO2 atmosférico é almacenar este gas onde non sexa prexudicial, por exemplo en depósitos subterráneos. Este procedemento, o secuestro xeolóxico de carbono, require do desenvolvemento previo de tecnoloxías como a oxicombustión, consistente en queimar os combustibles fósiles nas centrais con osíxeno puro en lugar de con aire, como se fai agora. Na oxicombustión xérase CO2 relativamente puro, listo para ser capturado e almacenado, mentres que a combustión tradicional emite un volume moito maior de gases de distinta composición.
Co traballo de Bermúdez de Castro preténdese optimizar con modelos numéricos o proceso de oxicombustión nas plantas de combustibles fósiles. O traballo, financiado pola Fundación Ciudad de la Energía, está asociado ao proxecto de construción en Ponferrada (León) dun xerador experimental de oxicombustión este mesmo ano.
O desenvolvemento matemático do grupo da USC presentouse no congreso europeo ‘Forward Look’ sobre Matemáticas e Industria, celebrado recentemente na sede do Consello Superior de Investigacións Científicas (CSIC), en Madrid.
Primeiro estudo da ESF sobre matemáticas e industriaNeste congreso déronse a coñecer ademais os resultados do primeiro estudo da Fundación Europea da Ciencia (ESF) sobre matemáticas e industria, unha iniciativa para fomentar o uso das matemáticas por parte da industria europea. Os expertos traballaron sobre un borrador de recomendacións que será presentado oficialmente nos próximos meses.
Unha das súas conclusións é que Europa pode sacar moito máis partido da súa bagaxe matemática. “A escola europea de matemáticas é a máis activa e produtiva do mundo”, manifestaron os expertos, pero as desigualdades entre países á hora de trasladar este coñecemento á industria “son unha importante desvantaxe”. Os gobernos europeos e a Unión Europea deberán toman unha actitude máis decidida no apoio da matemática europea como motor dunha economía sostible e máis dinámica.