Un total de 6.756 universitarios participaron nos programas de mobilidade da USC desde o curso 2004/2005

Nos últimos catro anos, participaron nos distintos programas de mobilidade da USC (Erasmus e Convenios Bilateriais) 6.756 estudiantes. A universidade compostelá enviou a distintos países de Europa e do mundo 2.439 e recibiu nos diferentes centros e titulacións dos campus de Santiago e Lugo 4.317, tamén procedentes de diversos países de Europa, mediante o programa Erasmus, e doutros países, a través de Convenios Bilaterais.
Así o confirman os datos presentados, este martes 13 en Lugo, polo vicerreitor de Relacións Exteriores, Lourenzo Fernández Prieto, que estivo acompañado do vicerreitor adxunto de Investigación e Proxección Exterior, Agustín Merino García, e o xefe da Oficina de Relacións Exteriores, Enrique López Veloso.
O informe da Universidade, con datos referiodos ao período 2004-2008, revela que a evolución dos programas de intercambio Erasmus e Bilateriais (Xan de Forcados) foi moi positiva neste periodo, pasando de 935 estudantes recibidos no primeiro destes cursos, a 1.195 no 2007-2008; e de 521 a máis de 600 estudiantes da USC que foron a universidades doutros países de Europa e do mundo. Durantes estes catro anos, os estudantes internacionais foron un 5,98% da matrícula da USC no Campus de Santiago e 1,52% no de Lugo. O de Santiago está neste caso moi por enriba da media das universidades españolas, mentres que o Campus de Lugo sítuase xusto na media.
ErasmusNos catro anos académicos que abarca o informe recibíronse 2.641 estudantes a través do programa Erasmus, formando as mulleres unha considerable maioría darredor do 71 por cento, Italia, Alemaña, Francia, Portugal, Polonia, Reino Unido, República Checa, foron os países dos que máis estudantes viñeron á USC a través deste programa, pero tamén se matricularon estudantes de Grecia, Bulgaria, Malta e Turquía.
Os centros que máis estudantes recibiron neste período a través deste programa foron Filoloxía, Ciencias Económicas e Empresariais, Ciencias Políticas e Sociais, Xeografía e Historia, Ciencias da Educación, Medicina e Odontoloxía, Ciencias da Comunicación, Farmacia, Dereito, Psicoloxía, ETS Enxeñería, no Campus de Santiago; e Veterinaria, EPS e Humanidades no Campus de Lugo.
Dos 1.834 estudantes da USC que foron de Erasmus neste período 2004-2008, 509 desprazáronse a universidades de Italia, e o resto a países de toda Europa, desde Portugal, Reino Unido, Francia Alemaña e Polonia ata Eslovenia ou Turquía. Neste caso, o centro que máis estudantes enviou foi a Facultade de Ciencias Económicas e Empresariais. Despois, Filoloxía, Ciencias Politicas, Farmacia, Medicina e Odontoloxía e a EPS de Lugo. Tamén neste caso, as mulleres forman unha porcentaxe lixeiramente inferior ás que viñeron estudar á USC, aproximadamente as tres cuartas partes da mobilidade.
Convenios bilateriaisDesde o ano 2006 rexistrouse un incremento do 23 por cento no fluxo de acollida de estudantes por Convenios Bilateriais. Este dato é do 59% desde o 2004. En total, nos catro anos a USC recibiu 1.242 estudiantes procedentes maioritariamente de México e Brasil, aínda que tamén de Chile, Arxentina, Estados Unidos, Corea do Sur, Perú, Colombia, Australia, Xapón, Canadá, e outros países como Suíza, Mozambique ou Porto Rico. O centro que máis alumnos recibiu foi a Facultade de Económicas e Empresarais (237), Dereito (235), Psicoloxía (116), Ciencias da Comunicación (78), Filoloxía (75), Ciencias Políticas (58). No Campus de Lugo, a Facultade de Ciencias, a EPS, e as facultades de Humanidades e Veterinaria foron os centros que recibiron máis alumnos internacionais a través destes convenios.
Nestes catro anos, foron a outras universidades a través de Convenios Bilaterais 200 estudantes da USC. No primeiro curso deste período, foron só 32 e no último, 2007-2008, arredor de 50. As universidades de Brasil, Arxentina e México son as que recolleron o maior número destes estudantes, aínda que tamén foron estudar alumnos galegos a Cuba, Chile, Canadá, Estados Unidos, Xapón, Australia e Perú, entre outros.
A EPS de Lugo é o centro da USC con máis universitarios estudando noutras universidades a través destes convenios (42), seguida da Facultade de Ciencias Económicas e Empresarias (33), Dereito (27). O resto dos centros teñen menos de 20 convenios.
Estes datos, segundo Lourenzo Fernández Prieto demostran que a USC é unha universidade internacional e, segundo el, “o fomento da mobilidade é unha vía de captación de estudantes imprescindible para o futuro. Somos unha universidade con moita capacidade formativa e investigadora que non poderá xustificarse cunha demanda exclusivamente local ou nacional nos anos vindeiros. O futuro da USC –engade– xógase en boa medida na capacidade de deseñar unha estratexia internacionalización horizontal para estar entre as 100 primeiras universidades europeas en todos os indicadores”.