Directores e orientadores de ensino medio de toda Galicia coñecen as accións do programa 'A Ponte' da USC

Preto de catrocentos directores e orientadores de Ensino Medio de toda Galicia asistirán este xoves 12 en Santiago á reunión anual que a USC organiza para dar a coñecer as actividades que o programa ‘A Ponte’ vai poñer en marcha o presente curso académico así como as novidades das probas de acceso e a adaptación da USC aos estudos de Bolonia.
A xuntanza abriraa o reitor Senén Barro ás 11:30 horas no Salón Nobre do Colexio de Fonseca e, logo de intervir o concelleiro Andrés Fariña, continuará o vicerreitor de Oferta Docente e Espazo Europeo de Educación Superior, Máximo Pló, para informar da implantación na USC dos estudos universitarios ao abeiro do Espazo Europeo de Educación Superior.
De seguido, o profesor Manuel Bermejo Patiño, representante da USC na CiUG, falará das novidades das probas de acceso á universidade (PAAU) para este curso, así como do acceso á USC. Finalmente, o coordinador do programa ‘A Ponte entre o ensino medio e a USC’, Luis Hervella, comentará as accións que se van desenvolver neste curso e entregaralle aos asistentes, entre outro material, a memoria de actividades do ano académico 2008-09.
Ademais, no transcurso do acto a directora do Centro de Hostalaría de Galicia, Patricia Cuevas Sarria, informará sobre os estudos do centro, ao igual que fará Vanesa García, do Servizo de Participación e Integración Universitaria, coas axudas que se lle prestan aos alumnos que padecen algunha incapacidade.