Uniemprende fomenta a cultura emprendedora no Campus de Lugo

Lugo acolle este xoves 12 de novembro un seminario de motivación empresarial, dirixido aos alumnos de quinto curso de Administración e Dirección de Empresas. Trátase da primeira actividade deste tipo que se leva a cabo no actual curso académico, dentro do programa de sensibilización que Uniemprende organiza todos os anos no campus lucense co obxectivo de fomentar a cultura emprendedora entre os universitarios.
Con este encontro, que se levará a cabo dende as 09:00 horas no Centro de Empresas e Innovación de Lugo (CEI-Nodus) e que conta coa colaboración do Bic-Galicia e o Concello de Lugo, Uniemprende pretende achegar aos participantes cómo se xeran as ideas empresariais, ao tempo que lles explica os instrumentos e recursos que están dispoñibles para axudar aos novos emprendedores. Ademais, ao longo do seminario, presentaranse casos reais de mozos que desenvolveron os seus proxectos empresariais en Galicia, amosando a orixe da súa idea, os recursos dos que dispoñían, as dificultades que tiveron que superar e os factores aos que poden atribuír o éxito dos seus negocios.
Este ciclo de seminarios para a difusión da creación de empresas desenvolverase ao longo de todo o ano académico, co fin de chegar aos estudantes dos últimos cursos das titulacións que se imparten no campus lucense.