A sociedade do coñecemento en tempos de crise e as vilas e portos galegos na Idade Media centran os cursos que se inauguran este martes en Compostela e Noia

Este martes 21 darán comezo en Noia e Compostela outros dous cursos da Universidade de Verán da USC, ‘Vilas e portos na fachada cántabro-atlántica, séculos XII-XVI’ e ‘A sociedade do coñecemento en tempos de crise’, respectivamente.
Curso en Santiago Ás 9:30 horas no Salón de Graos da Facultade de Ciencias Económicas e Empresariais comezará o curso que se desenvolverá en Santiago ata o 24 de xullo baixo a dirección de Óscar Rodil e Carmela Sánchez. Nel abordaranse aspectos de grande interese e plena actualidade, máxime nun contexto de crise do modelo actual, tales como a mercantilización do coñecemento científico-técnico, os cambios no modelo de universidade, a regulación da propiedade intelectual no ámbito internacional e os retos da sociedade da información.
Ao longo das trinta horas do curso analizaranse nos relatorios cuestións concretas como as tendencias cara unha Sociedade do Coñecemento en Europa, a economía do coñecemento no contexto de crise actual, o papel do sector público, o marco de Boloña, a regulación do mercado do coñecemento e as normas baseadas no sistema de propiedade intelectual como alternativa ao sistema de patentes.
Ademais, contémplase o desenvolvemento de tres mesas redondas sobre o debate entre o público e o privado (21 de xullo ás 18:30), o Espazo Europeo de Educación Superior (22 de xullo ás 12:00) e a propiedade intelectual (23 de xullo ás 12:30).
Vilas e portos, en NoiaA USC celebrará do 21 ao 24 de xullo en Noia o curso ‘Vilas e portos na fachada cántabro-atlántica, séculos XII-XVI’, dirixido por Elisa Ferreira Friegue co obxecto de achegar aos asistentes o fenómeno urbano da Galicia mariñeira da Idade Media, dentro do contexto do Golfo de Biscaia e a costa atlántica. A inauguración será ás 10:00 horas na Casa de Cultura.
O programa inclúe un enfoque multidisciplinar da temática do curso abordándose desde unha perspectiva política, económica, artística e relixiosa.