Un seminario promove a cultura emprendedora en Lugo

Os alumnos de cuarto curso de Administración e Dirección de Empresas de Lugo son os destinatarios dun seminario de motivación empresarial que se celebrará este mércores 2 de decembro. Trátase do segundo seminario deste tipo que se desenvolve neste curso académico no campus lugués, dentro do programa de sensibilización que Uniemprende organiza todos os anos co obxectivo de difundir e fomentar a cultura emprendedora entre os universitarios.
O seminario desenvolverase dende as 16:00 ata as 18:00 horas nas instalacións do CEI-Nodus, coa colaboración do Bic-Galicia e o Concello de Lugo. Con esta actividade, Uniemprende pretende achegar aos participantes cómo se xeran as ideas empresariais, ao tempo que lles explica os instrumentos e recursos que están dispoñibles para axudar aos novos emprendedores. Ademais, ao longo do seminario, presentaranse casos reais de mozos que desenvolveron os seus proxectos empresariais en Galicia, amosando a orixe da súa idea, os recursos dos que dispoñían, as dificultades que tiveron que superar e os factores aos que poden atribuír o éxito dos seus negocios.
Este ciclo de seminarios para a difusión da cultura emprendedora entre os universitarios desenvolverase ao longo de todo o ano académico, co fin de chegar aos estudantes dos últimos cursos de todas as titulacións que se imparten no campus lugués.