A USC congrega a especialistas de todo o mundo en lingüística histórica da lingua española

Converterse no foro por excelencia da lingüística histórica da lingua española é a finalidade perseguida polo VIII Congreso Internacional de Historia da Lingua Española, que o próximo luns 14 vai abrir as súas portas na Universidade compostelá. A inauguración oficial do encontro que se estenderá ata o día 18 celebrarase no Salón Nobre do Colexio de Fonseca a partir das 11:00 horas baixo a presidencia da vicerreitora de Calidade, Mª Dolores Álvarez. Está prevista a asistencia do conselleiro de Cultura, Roberto Varela Fariña.
A primeira das conferencias plenarias do encontro terá lugar no mesmo Salón Nobre e estará protagonizada polo profesor Roger Wright que falará sobre ‘A composición das Actas do Concilio de Córdoba (839)’. A sesión reanudarase pola tarde xa na Facultade de Filoloxía que acubillará no seu Salón de Graos, a partir das 16:15 horas, unha mesa redonda sobre ‘A documentación romance’. Nela intervirán Germá Colón, da Universidade de Basilea; Antonio Salvador, da Universidade de Estremadura; Claudio García, da Universidade da Rioxa; e Pilar García, do Consello Superior de Investigacións Científicas.
De seguido, iniciarase unha serie de sesións paralelas de comunicacións dedicadas de xeito monográfico a cuestións relacionadas coa morfoloxía e sintaxe históricas; lexicoloxía, lexicografía, e semántica históricas; análise do discurso e pragmática histórica; historia do español en América; e sobre onomástica e toponimia. O profesor de Zaragoza José Mª Enguita porá o broche desta primeira xornada coa conferencia plenaria ‘Historia natural e léxico na obra americanista de Félix de Azara’.
Presentación de actasIncluido no programa do encontro, presentaranse tamén o luns 14 a partir das 11:30 horas as actas do Congreso Internacional ‘La obra de Lapesa desde la filología actual’editadas pola Sociedad Estatal de Conmemoraciones Culturales (SECC), baixo a coordinación do Ministerio de Cultura.
A presentación correrá a cargo de José Jesús de Bustos (a cargo da edición xunto a Rafael Cano) e Amaya de Miguel (directora de publicacións da SECC).