O comportamento da materia nos primeiro intres do universo, a análise nun libro do catedrático da USC Carlos Pajares

Relativistic Nuclear Interactions é o título do libro que veñen de publicar o catedrático da USC, Carlos Pajares, xunto co investigador Yuliy M. Shabelski do Instituto de Física Nuclear de Gatchina en San Petersburgo na editorial URSS. No estudo explícase o proceso de obtención de materia de alta densidade e temperatura, reproducindo as condicións da materia nos primeiros intres do universo.
A obra, ferramenta básica para estudantes de doutoramento e investigadores, expón os principais aspectos das colisións entre partícula e núcleo, núcleo e núcleo, e a materia de alta densidade e temperatura.
Froito da relación ao longo de máis de dezaoito anos entre físicos rusos e da USC, a publicación achega os datos recollidos en materia de alta densidade polos científicos do Centro Europeo de Investigacións Nucleares, en Xenebra, e de investigadores de Estados Unidos, sobre todo do Laboratorio Nacional de Brookhaven.
Partindo do anterior, o catedrático indica que na obra “anticípase a información que acadará o equipo de Xenebra” mediante o novo acelerador de partículas a inaugurar o vindeiro día 2 de outubro deste ano.