A USC amplía ata o 20 de maio o prazo para solicitar a participación en proxectos de cooperación de Nacións Unidas
Cinco estudantes da USC poderán participar en proxectos de cooperación para o desenvolvemento a través do programa de Voluntariado Universitario de Nacións Unidas ante os Obxectivos do Milenio. O Servizo de Participación e Integración Universitaria acaba de ampliar ata o 20 de maio o prazo para presentar a solicitude.
Co programa trátase de aumentar ou mellorar a capacidade das persoas e institucións nos países do sur, impulsando as súas habilidades e proporcionando servizos directos para apoiar institucións e comunidades. En total, para os universitarios españois ofrécense 45 prazas, que se distribuirán entre Burkina Faso, Sri lanza, Tailandia, Ruanda, Kyrgyzstan, Indonesia, India, Nepal, Vietnam, Bolivia, Brasil, República Dominicana, Ecuador, Exipto, Guatemala, Honduras e Perú.
Os seleccionados deberán ser alumnos de últimos cursos ou de posgrao, cun alto nivel de inglés e do idioma requirido para cada posto e coñecementos da área específica de cooperación nos que se centre o proxecto. Entre outros, as diversas accións do programa diríxense ao tratamento da fame e a pobreza extrema, acadar a ensinanza primaria universal, promover a igualdade entre xéneros, reducir a mortalidade infantil, mellorar a saúde materna, combater a SIDA e outras enfermidades e garantir a sustentabilidade do medio ambiente.
A selecciónA Universidade de Santiago poderá escoller ata un máximo de cinco candidatos, que terán que acudir a unha entrevista persoal en Compostela. A selección definitiva das candidaturas preseleccionadas pola USC deberá ser logo confirmada por Nacións Unidas, que o fará público o 25 de xuño. Unha vez decididos os voluntarios, estes realizarán seminarios de formación en Madrid e Bonn en setembro de 2008 para inmediatamente comezar o voluntariado durante un período de seis meses.
Os interesados poden presentar as solicitudes e acadar máis información no Servizo de Participación e Integración Universitaria, tanto en Santiago coma en Lugo.