O Consello de Goberno da USC analiza na súa próxima xuntanza os orzamentos da institución académica para 2008

O Consello de Goberno da USC reúnese o vindeiro mércores, día 26, para someter a aprobación os orzamentos da institución académica para o vindeiro ano, o calendario académico do curso 08-09 e a convocatoria de axudas para investigación para 2008, entre outros asuntos. A xuntanza dará comezo ás 9:30 horas no Salón Reitoral do Colexio de San Xerome.
A reunión inclúe na súa orde do día os complementos retributivos autonómicos, a modificación da RPT do PDI, a convocatoria de bolsas predoutorais destinadas a estudantes iberoamericanos, a estratexia da USC para a realización de convenios con universidades estranxeiras, acordos de interese mutuo con Departamentos, o documento provisorio de deseño do Plan de Estudos ou a modificación de Programas Oficiais de Posgrao.
Completarían a relación de asuntos a tratar os relativos a cambio de dedicación do PDI e de localidade, a integración no corpo de titulares de universidade, a proposta de inclusión de liñas de investigación e profesores nos programas de doutoramento implantados conforme o RD 56/2005, a corrección de erros do límite de prazas na titulación de Medicina, a proposta de dirección do Departamento de Estatística e Investigación Operativa, o regulamento de réxime interno do Departamento de Enfermaría e convenios.