A campaña 'Deixa o fume fóra' continúa co seu obxectivo de mellorar a saúde da USC

A USC desenvolve desde hai meses a campaña ‘Deixa o fume fóra’ co obxectivo de conseguir un ambiente saudable mediante a aplicación da Lei reguladora do tabaco na USC e preservar a saúde dos estudantes e do persoal docente e administrativo. A iniciativa promoveuna a Vicerreitoría de Calidade e Planificación a través da Coordinación do Plan de Desenvolvemento Sostible e en colaboración coa directora do Servizo de Vixilancia da Saúde, Carmen Pardiñas, e cos profesores Elisardo Becoña, da Unidade de Tabaquismo da Facultade de Psicoloxía, e Agustín Montes, do Departamento de Psiquiatría, Radioloxía e Saúde Pública da Facultade de Medicina.
Coa finalidade de que a campaña chegue ao maior número de persoas, a Coordinación do Plan de Desenvolvemento Sostible vai distribuír en todos os centros da USC material divulgativo no que se informa acerca das unidades que prestan apoio para o abandono do hábito tabáquico. Deste xeito, todo aquel que desexe deixar de fumar ten a posibilidade de participar nos grupos de tratamento que se están a constituír durante o mes de outubro.
Durante o curso 2007-2008 programaranse ademais novas actividades destinadas a incrementar a concienciación dos fumadores para que deixen o tabaco e mellorar así a saúde da comunidade universitaria.
Resultados das acciónsNo período que abrangue dende xaneiro ata mediados do mes de xuño de 2007, foron 98 as persoas que se achegaron ás unidades de deshabituación tabáquica para solicitar información. Nese tempo foron tratadas 59, das que 49 o fixeron individualmente e 10 en grupo. En total, leváronse a cabo 243 sesións de tratamento (231 individuais e 12 en grupo).
Por outra banda, entre abril e maio realizáronse nos centros avaliacións gratuítas de CO no aire expirado á vez que se informaba sobre os programas de apoio psicolóxico e médico que a USC ofrece a todos aqueles que queiran deixar de fumar. Ás medicións sometéronse 723 persoas, das que 318 eran fumadoras e das que un 57% expresou o seu desexo de abandonar o hábito. Esta actividade estivo enmarcada dentro das bolsas de Sustentabilidade, Participación e Integración Universitaria que convocan conxuntamente o Servizo de Participación e Integración Universitaria e a Coordinación do Plan de Desenvolvemento Sostible.