A experiencia do Plan de Desenvolvemento Sostible da USC preséntase en Salamanca

A coordinadora do Plan de Desenvolvemento Sostible da USC, Dora Blanco Heras, participa en Salamanca este mércores 17 como relatora convidada nunha xornada sobre educación ambiental organizada polo Servizo de Educación Ambiental da Consellaría de Medio Ambiente de Castela e León. Nesta xornada as Universidades de Burgos, León, Salamanca, Santiago de Compostela e Valladolid comparten as súas experiencias en materia de desenvolvemento sostible e educación ambiental.
A xornada centrarase nun primeiro momento no seguimento das actividades desenvolvidas no marco dos convenios de educación ambiental entre a Consellaría de Medio Ambiente e as universidades públicas de Castela e León. Seguidamente, a coordinadora do Plan de Desenvolvemento Sostible ofrece na Aula Unamuno do Edificio Histórico da Universidade de Salamanca unha conferencia na que exporá as accións levadas a cabo dende a USC para promover o compromiso da comunidade universitaria coa mellora ambiental.
Ademais da conferencia, Dora Blanco participará nun seminario e mesa redonda sobre os plans de xestión de residuos universidades españolas no que debaterá xunto con representantes das oficinas ambientais das universidades castelá leonesas sobre os modelos de xestión de residuos empregados polas universidades. Tanto a conferencia como o seminario e a mesa redonda son actividades abertas a toda a comunidade universitaria.