A USC oferta para o vindeiro curso académico 1.315 prazas de aloxamento no seu Servizo Universitario de Residencias

O Servizo Universitario de Residencias da USC (SUR) ofrecerá o vindeiro curso un total de 1315 prazas de aloxamento distribuídas nas súas tres residencias universitarias e outros tantos colexio maiores. O prazo para a presentación de instancias permanecerá aberto ata o día 6 de xullo, no caso das persoas que solicitan a readmisión e estudantes de programas de mobilidade nacional e intercambio internacional, e ata o 13 de xullo para as de nova admisión.
Do total das prazas ofertadas, 1.060 destinaranse a estudantes de 1º e 2º Ciclo e de programas oficiais de posgrao, 105 a alumnos de 3º Ciclo e investigadores en formación,95 a estudantes de programas de mobilidade e intercambio, 8 a Persoal Docente e Investigador e Persoal de Administración e Servizos, 20 a estudantes de Posgrao propio e do Curso de Aptitude Pedagóxica ou equivalentes, e 27 para membros da comunidade universitaria da USC discapacitados.
Unha vez aplicados os baremos económicos correspondentes, están subvencionadas todas as prazas asignadas aos estudantes cuxa Renda Persoal Dispoñible (RPD) sexa inferior a 9.000 euros. Neste senso, os prezos das prazas oscilan entre os 43 e os 205 euros para aquelas subvencionadas e entre os 234 e 273 euros para solicitantes cuxa RPD sexa igual ou superior a 9.000 euros.
Unha vez procesadas as solicitudes, o día 1 de agosto publicaranse as listas provisorias de solicitantes admitidos, facendo constar a súa puntuación e a orde de preferencia dos centros. O día 31 de agosto publicaranse as listas definitivas de admitidos en cada centro, a lista de agarda e a relacións de excluídos. As persoas que figuren en lista de agarda e desexen seguir optando a unha praza no SUR deberán confirmalo antes do día 7 de setembro.
O SUR, un servizo de calidade
O Servizo Universitario de Residencias, considerado un dos mellores de Europa, complementa o seu servizo propio de aloxamento con numerosas actividades de carácter sociocultural e deportivo cumprindo así o obxectivo de proporcionar, ademais dos servizos básicos, formación integral aos membros da comunidade universitaria. Así, os seus centros dispoñen de cafeterías, comedores, bibliotecas, salas de informática con acceso a Internet ou conexión wi-fi, entre outras dotacións.
O SUR confórmano tres Colexios Maiores e dúas residencias universitarias situadas no Campus de Santiago e outra residencia no de Lugo, sendo todos mixtos con habitacións dobres e individuais e adaptándose a persoas con necesidades especiais. Deste xeito, os centros que conforman o SUR son, en Santiago de Compostela, os Colexios Maiores Rodriguez Cadarso, San Clemente e Fonseca, e as Residencias Burgo das Nacións e Monte da Condesa. En Lugo, a USC conta coa Residencia Jesús Bal y Gay.