Unha organización eficiente
Establecer un horario de traballo definido, incluíndo descansos periódicos, é unha das principais recomendacións do Servizo de Prevención de Riscos Laborais da USC (SPR). Nas sesións de teletraballo que o persoal da Universidade desenvolve por mor da crise do COVID-19 e o decreto de estado de alarma, deben introducirse pausas, sendo máis recomendables os recesos curtos e frecuentes que longos e escasos.
Durante as pausas é aconsellable realizar sinxelos exercicios de relaxación visual, así como alternar tarefas en caso de períodos intensos de utilización da pantalla. Establecer prazos realistas para levar a cabo as diferentes actuacións e comprobar periodicamente o seu cumprimento son outros dos consellos propostos polo SPR.
Procurar o benestar psicosocial
Vestirse para prepararse psicoloxicamente para empezar a traballar; comezar o día á mesma hora de chegada ao posto de traballo; cambiar de habitáculo dentro da casa para axudar a desfacer bloqueos mentais; ou interactuar telefonicamente con compañeiros/as de traballo, son pautas precisas para desenvolver unha actividade equilibrada no día a día.
Outros dos consellos que proporciona o Servizo de Prevención de Riscos Laborais son lavar as mans frecuentemente con auga e xabón, usar panos desbotables, evitar contacto con persoas enfermas e manter unha correcta alimentación.