Un taller de monicreques abre o programa creativo da Aula de Teatro no Campus de Lugo

O taller de elaboración de monicreques que está a impartir Marga Portomeñe desde comezos de novembro na Aula de Teatro e Danza da Facultade de Veterinaria do Campus de Lugo abre a programación de actividades creativas impulsada este outono pola Área de Cultura da USC na sede universitaria luguesa, na que o dramaturgo e director de teatro Ernesto Is comezará a impartir o xoves un obradoiro de dramaturxia.

Estas dúas actividades, que xunto co taller de arte dramática impartido por Carmen Conde, conforman o programa creativo deseñado desde a Área de Cultura da USC no Campus de Lugo, manteñen aberto o prazo para a inscrición de novos participantes.

As persoas interesadas en tomar parte en calquera destas actividades de formación e creación poden formalizar a súa matrícula de balde a través do enderezo de correo electrónico cultura.lugo [at] usc.es (cultura[dot]lugo[at]usc[dot]es). Tamén se pode acadar máis información a través do número de teléfono 982 821 513.

A USC contempla asemade a posibilidade  de organizar quendas formativas en sesión de mañá e tarde dos talleres de dramaturxia e deseño e manexo de marionetas de existir un elevado número de participantes. Ademais, Ernesto Is tamén brinda a posibilidade de seguir as sesións do seu obradoiro a través da plataforma virtual Zoom.