Un estilo de vida para retrasar o envellecemento
A suma dun conxunto de hábitos alimentarios xunto cun determinado estilo de vida que une aos territorios de Galicia e o Norte de Portugal dá lugar á denominada ‘Dieta Atlántica’, cuxas pezas chave baséase no abundante consumo de peixes, lácteos e produtos frescos de tempada, alén de técnicas culinarias sinxelas. O libro Bases Científicas da Dieta Atlántica, promovido e dirixido pola Fundación Dieta Atlántica da USC, recolle os piares conceptuais e científicos deste tipo de alimentación a través de preto dunha vintena de capítulos elaborados por autores internacionais e nos que se fai fincapé, entre outros aspectos, en que este tipo de dieta contribúe á prevención do cancro e do envellecemento.
Coa colaboración de Vegalsa-Eroski e a Sociedade Española de Obesidade, a obra foi presentada este martes polo padroado da Fundación, nun acto que contou coa presenza do reitor Antonio López. Ademais de establecer as bases deste modelo alimentario, o libro define o concepto ‘Dieta Atlántica’ non só para a comunidade científica senón tamén para nutricionistas, produtores e responsables de distribución. “Posiblemente a Dieta Atlántica póidase aplicar a outras rexións de España, Portugal e Europa, como un modelo de alimentación saudable e tamén sostible dende o punto de vista ambiental, xa que posúe unha das pegadas de carbono máis baixas de Europa”, explicou Felipe F. Casanueva, vicepresidente da Fundación Dieta Atlántica, tamén presente no acto.
Prevención do cancro
No libro abórdanse temas tan diversos como a promoción deste tipo de alimentación nunha comunidade mediante a intervención das familias, a actividade física como compoñente esencial ou o papel da dieta atlántica na prevención da obesidade. Asemade, no libro abórdanse tamén as características da dieta da poboación galega, a cal manifesta aspectos positivos como o alto consumo de vexetais, hortalizas e legumes, aínda que se advirte de que este consumo tende a descender entre os máis novos. No libro incídese tamén no feito de que o consumo dalgúns destes alimentos contribúe á prevención do cancro e do envellecemento, factor este último que explicaría que Galicia conte dunha das poboacións máis lonxevas do mundo. Nesta liña, a doutora Ana Belén Crujeiras cualifica a ‘Dieta Atlántica’ como unha posible “dieta epixenética”, cuxos compostos poden inducir efectos beneficiosos para a saúde por medio de mecanismos que regulan o funcionamento dos xenes e que poden actuar na prevención de enfermidades. No volume inclúese ademais un capítulo no que se establece un índice de Dieta Atlántica que sexa operativo e poida ser utilizado de forma habitual.
Os traballos de redacción e edición do libro Bases Científicas da Dieta Atlántica foron coordinados por Felipe F. Casanueva, que contou co asesoramento dun comité científico integrado pola xefa do grupo de epixenómica e nutrición do Instituto de Investigación Sanitaria de Santiago de Compostela, Ana Belén Crujeiras; o vicepresidente da Sociedade Española de Obesidade, Diego Bellido; a profesora do Instituto Politécnico de Viana do Castelo, Manuela Vaz-Velho e a pediatra Rosaura Leis, integrante do padroado da Fundación Dieta Atlántica e coordinadora da Unidade de gastroenteroloxía, hepatoloxía e nutrición pediátrica do Instituto de Investigación Sanitaria de Santiago de Compostela.
