A USC súmase á celebración do Día do doante de órganos

Galicia realizou 328 transplantes de órganos ao longo de 2020, dos que 141 foron de ril. Coa intención de reivindicar este “exemplo solidario” e de superalo, a Federación Alcer Galicia conmemora este mércores 2 de xuño o Día do Doante de órganos ao que tamén se suma a USC.

Baixo o lema ‘Doar é amar. A túa solidariedade danos vida’, dende a Federación queren lanzar unha mensaxe de agradecemento “a todas as persoas doadoras e ás súas familias, que favoreceron a mellora da calidade de vida das persoas que necesitan un órgano”.  “Dende a Federación Alcer Galicia queremos agradecer cada xesto de amor, neste ano de dificultades e distancias é preciso reforzarnos como sociedade solidaria e empática nas necesidades dos demais”, apuntan.

O proceso de doazón e transplantes, ben pasado un ano do inicio da pandemia, logrou acadar un ritmo que se aproxima ao de 2019. De feito, España mantense como líder mundial en doazón  de órganos dende hai 29 anos. “É de recibo  agradecer a todo o entramado que configura á rede de transplantes, desde cada sanitario a cada persoa que está a espera dun órgano, xa que configuramos unha sociedade que debe de manter o exemplo solidario. Vainos a vida nestes xestos”, conclúen dende a Federación.