'Integrando as persoas nunha IoT consciente do contexto'

O venres, día 8 de abril, ás 12.00 horas, o Salón de Actos do CiTIUS acollerá a conferencia 'Integrando as persoas nunha IoT consciente do contexto', a cargo do investigador da Universidade de Estremadura, Daniel Flores. O relatorio ofrecerá un repaso por algúns conceptos fundamentais da Internet das Cousas e os desafíos actuais que impactan no seu desenvolvemento. Tamén servirá para afondar no desenvolvemento do paradigma Situational-Context e as principais tecnoloxías empregadas.

O evento será emitido tamén en liña a través de MS TEAMS.

Resumo 

O termo Internet das Cousas ( IoT) está cada vez máis presente no noso día a día. Isto refírese ás contornas intelixentes onde atopamos calquera dispositivo con conectividade a internet e capaz de intercambiar información, como smartphones, smartwatches, lámpadas, aires acondicionados, etc. Desta forma, é posible crear contornas sociais onde as persoas poden interactuar con estes dispositivos para facer máis sinxela a súa vida ou automatizar tarefas.

O contexto que rodea estas contornas debe ser tido en conta para personalizar os comportamentos dos dispositivos. Con contexto referímonos a todos aqueles elementos que inflúen na contorna, como o número de dispositivos, as funcionalidades que posúen, as persoas que hai ao redor, a localización, a data e hora, etc. Actualmente, estamos a traballar no desenvolvemento dun paradigma denominado Situational- Context cuxo obxectivo é modelar as situacións particulares que se producen nestas contornas. O obxectivo principal é adaptar o comportamento dos dispositivos ás necesidades das persoas de maneira automática e coa mínima intervención do usuario. Para iso estase utilizando unha metodoloxía Design Thinking centrada nos usuarios e que permite detectar necesidades, identificar retos concretos, e desenvolver solucións. Para o paradigma Situational- Context desenvolveuse unha arquitectura que permite, desde a integración de diferentes tipos de dispositivos, ata a identificación de situacións na contorna, pasando pola xestión do contexto e descrición das entidades. Esta arquitectura permite a integración de dispositivos a través de diferentes protocolos de comunicación, como Bluetooth ou Wifi. Tamén permite que tanto os dispositivos como as persoas sexan descritos dunha maneira común e que sexa facilmente interpretable polas aplicacións IoT. Esta descrición das entidades realízase mediante o estándar proposto polo W3 C denominado Thing Description, de maneira que a información poida ser facilmente interpretable polas aplicacións IoT. O intercambio destas descricións realízase mediante o protocolo MQTT de paso de mensaxes, e son xestionadas con ontoloxías para establecer as relacións e enriquecer o coñecemento sobre elas. Finalmente, coa información destas descricións adáptase o comportamento dos dispositivos, co que se consegue satisfacer as necesidades das persoas sen apenas intervención humana.