Salón de actos José Rodríguez Mourelo
O catedrático da USC José Vázquez Tato ofrecerá o relatorio ‘A comunicación na ciencia’ no acto de entrega de premios do I Concurso universitario de vídeos sobre ciencia en galego, que se celebrará o venres 20, a partir das 12.00 horas
A Facultade de Ciencias do Campus de Lugo da USC acollerá este venres 20 de maio, a partir das 12.00 horas, no salón de actos José Rodríguez Mourelo, o acto de entrega de premios dos certames ‘Petiscos de ciencia’ e do I Concurso universitario de vídeos sobre ciencias en galego, unha dobre convocatoria promovida polo centro universitario lugués xunto co Servizo de Normalización Lingüística da USC co obxectivo de “achegar” a investigación á xente nova, ademais de favorecer a divulgación en lingua galega do traballo desenvolvido pola comunidade científica.
O vicerreitor de Organización Académica e Campus de Lugo da USC, Francisco Fraga, presidirá a entrega de galardóns desta convocatoria, aberta á presentación de propostas por parte de alumnado de ESO, BAC ou Formación Profesional (FP), así como de calquera estudante matriculado en titulacións oficiais na USC.
O técnico do Servizo de Normalización Lingüística da USC na sede universitaria luguesa Xusto Rodríguez Río; o catedrático da área de Química Física da USC José Vázquez Tato, que ofrecerá nesta sesión o relatorio titulado ‘A comunicación na ciencia’, e a decana da Facultade de Ciencias, Asteria Luzardo, completan a quenda de relatores que intervirán na cerimonia de entrega e premios e diplomas dun certame que distinguirá as catro mellores propostas con gratificacións en metálico por un importe global de 1.500 euros.