Santiago de Compostela
Estes encontros fóra de aula ofrecen a posibilidade de achegarse a outras linguas a través da participación nunha actividade saudable que permite coñecer lugares de interese da contorna compostelá.
O xoves, día 9 de xuño, o programa de Andainas Lingüísticas da USC ofrece un novo percorrido para as persoas interesadas en afondar nas súas capacidades noutras linguas. Nesta ocasión, a excursión partirá ás 16.30 horas dende a Capela do Carme de Abaixo para transitar pola contorna do río Sarela, o parque Finca do Espiño e a Granxa do Xesto. A duración estimada do paseo é de 2 horas.
Para tomar parte nel, cómpre cursar inscrición previa a través do formulario dispoñible na web do Servizo de Deportes. O prazo remata o 8 de xuño.
A tarifa de inscrición é de 4€ para a comunidade universitaria, 5€ para o alumnado egresado e 6€ para o resto de colectivos. Ademais, a comunidade universitaria pode facerse cun bono para 3 andainas polo importe de 11 €.