O primeiro prazo de matrícula para acceder a grao esténdese do 15 ao 18 de xullo
Este xoves 14 publícase a primeira listaxe de persoas admitidas para cursar un grao no Sistema Universitario de Galicia. O primeiro prazo de matrícula estenderase do 15 ao 18 de xullo. Antes de iniciar o proceso, a USC ofrece unha guía visual con todos os pasos a seguir.
Logo deste primeiro período, abriranse cinco quendas máis de matrícula, así como unha derradeira fase para cubrir as prazas vacantes. Deste xeito, o 22 de xullo darase a coñecer a segunda listaxe de persoas admitidas, estendéndose o seu prazo de matrícula do 23 ao 27 de xullo. A terceira convocatoria verá a luz o 29 de xullo e a matrícula poderá formalizarse entre os días 30 de xullo e 2 de agosto.
O 4 de agosto publícase a cuarta lista de admitidos/as (matrícula do 5 ao 8 de agosto); mentres que o día 9 do mesmo mes dáse a coñecer unha nova listaxe (matrícula do 10 ao 11 de agosto). A sexta quenda publícase o 2 de setembro (matrícula do 3 ao 6 dese mes). A partir de aí, ábrese unha convocatoria de vacantes que se estenderá ata o 15 de outubro.
