XI Xornadas de Xeomorfoloxía Litoral

Do 27 ao 29 de xullo, a undécima edición das Xornadas de Xeomorfoloxía Litoral achegará a Compostela os novos achados e ferramentas cara ao estudo científico da costa, así como as investigacións arredor da súa evolución nun contexto de cambio global e subida do nivel do mar.  Organizada pola área de Xeografía Física da Universidade de Santiago de Compostela e o Centro de Investigación Mariña da Universidade de Vigo, a undécima edición das xornadas contará coa presentación de máis de 60 comunicacións de alto nivel científico, chegadas de 29 universidades e centros de investigación tanto españois como internacionais. 

Ademais das sesións que se desenvolverán na Facultade de Xeografía e Historia da USC, estas xornadas contarán con visitas á Illa de Arousa o xoves 28, co Illote Areoso e O Carreirón como focos de atención, e ofrecerá o día 29 un percorrido pola costa de Muros, Carnota e Dumbría. Nas diferentes paradas, as persoas asistentes poderán descubrir a costa galega e as súas particularidades, ademais de coñecer da man das autoridades locais dos Concellos da Illa de Arousa, Muros, Carnota e Dumbría a difícil xestión destes espazos naturais.

Coa nova edición, estas xornadas de carácter bianual que comezaron andadura en Cádiz no ano 2000, volven a Galicia e retoman a súa actividade tralo paro obrigado motivado pola pandemia. 

Toda a información sobre o evento, o programa e participantes pode ser consultada na súa páxina web oficial.