Un paseo autoguiado pola cidade de compostela ao son de autoficcións xeolocalizadas, froito da colaboración entre USC, o Grupo Chévere, o Centro Dramático Nacional e teatros e compañías locais
Coa vontade de fomentar o coñecemento e o contacto coa súa veciñanza, a Facultade de Filoloxía da USC organiza para os próximos días 26, 27 e 28 de setembro a actividade Dramawalker-Vite, un proxecto do Grupo Chévere desenvolvido co Centro Dramático Nacional e en colaboración con outros teatros e compañías locais, baseado en ficcións sonoras xeolocalizadas para ser escoitadas dando un paseo. Dramawalker Vite propón unha andaina audioguiada dende o corazón da cidade histórica ao barrio de Vite para mergullarse nos relatos que retratan a súa memoria urbana. As persoas participantes poderán escoitar pezas sonoras feitas a partir de historias recollidas da veciñanza e asociadas a distintos lugares do barrio.
A actividade estará guiada por Xesús Ron, director artístico de Chévere e terá como punto de partida, ás 18.00 horas, o antigo Colexio dos Irlandeses (Rúa Nova, 44) para rematar no barrio de Vite ás 20.30 horas. A inscrición pode formalizarse neste formulario. A actividade está aberta ao conxunto da comunidade universitaria.