Elvira López Mourín: unha enfermeira de altura

A Facultade de Enfermaría acollerá a semana do 17 ao 21 de outubro a a exposición 'Elvira López Mourín: unha enfermeira de altura' organizada pola Academia de Enfermaría de Galicia e o Colexio de Enfermaría de Lugo.

O acto de inauguración da exposición terá lugar o día 17 ás 12.00h no Salón de actos da Facultade  e contará coas intervencións de Isidoro Rodríguez Pérez, presidente da Academia de Enfermaría de Galicia; Miguel Ángel González Canomanuel, médico investigador; Emilio Rubén Pego Pérez, profesor da Facultade de Enfermaría da USC; Lourdes Bermello López, presidenta do Colexio Oficial de Enfermaría de Lugo e integrante da Académica da Academia de Enfermaría de Galicia; e Ana Isabel Silveira Rodríguez, decana da Facultade de Enfermería da USC. 

Trátase dunha exposición itinerante que  chega a Compostela tras pasar pola Escola Universitaria de Lugo da USC, no concello de Láncara, e o Hospital Ribera Povisa de Vigo e que tamén visitará o Complexo Hospitalario Universitario de Santiago, a Escola de Enfermaría da Coruña, o Complexo Hospitalario de Ourense, o Hospital Meixoeiro, a Escola de Enfermaría de Pontevedra, a Facultade de Enfermaría e Podoloxía (campus Ferrol), e a Consellaría de Sanidade.

Elvira López Mourín

Nada en Láncara en 1893, entra a formar parte en 1918 da primeira promoción de enfermeiras profesionais da Cruz Vermella xunto a outras catro compañeiras. O 1 de novembro de 1922  participa, de forma voluntaria, no primeiro voo en misión sanitaria da aviación española, realizado durante o conflito bélico do Rif.  A súa decisión converteuna non só na primeira enfermeira que participou neste primeiro voo sanitario realizado en España, senón tamén no primeiro transporte aéreo de feridos e nun dos primeiros voos nocturnos da aviación española fitos dos que se cumpre un século o vindeiro 1 de novembro de 2022.