Saída de campo ao abeiro do proxecto de divulgación científica da investigación mineralóxica 'Minerais. Ver o invisible'
A Área de Infraestruturas de Investigación (RIAIDT) e o Museo Historia Natural da USC promoven unha nova saída ao campo de divulgación científica este sábado 22 de Abril. Trátase dunha visita xeolóxica guiada polo Pico Sacro para coñecer a contorna deste lugar emblemático da bisbarra de Santiago.
O xeólogo Francisco Canosa guiará esta expedición que partirá ás 10.30 horas dende o Pavillón de Lestedo e que terá como primeira parada o cumio do Pico Sacro para tratar da súa orixe xeolóxica, da presenza dun sistema de covas único na Terra e da formación do filón de seixo. De seguido, visitarase Ponte Ulla, para admirar o canon creado polo río e entender o seu proceso de formación.
A visita está orientada a persoas adultas e é de balde previa inscrición na web da RIAIDT. Se se inscriben menores de idade deben ir sempre acompañados dunha persoa adulta ao cargo.
A actividade conta con financiamento do Consello Social da USC.