A comunidade investigadora e o tecido socio-económico avanzan na mellora da resiliencia da Galicia do mar
A USC forma parte do consorcio de investigación previsto para o desenvolvemento do Programa Complementario de Ciencias Mariñas de Galicia que este mércores 3 desenvolve a segunda edición da súa asemblea xeral. Esta iniciativa pretende transformar e mellorar a resiliencia da Galicia do mar, coordinando e impulsando para iso o traballo de investigación, desenvolvemento tecnolóxico e o diálogo do sector da ciencia e a innovación con e para a sociedade na comunidade galega, cun foco claro e estratéxico na ciencia mariña da comunidade. O Programa afonda na colaboración entre a comunidade investigadora galega e o tecido social, económico e institucional das actividades vinculadas ao mar.
Organizada polo Consello Superior de Investigacións Científicas (CSIC), a través do Instituto de Investigacións Mariñas (IIM), xunto co Centro Tecnolóxico do Mar (CETMAR) e a Universidade de Vigo (UVigo), a Asemblea conta coa participación de representantes de todas as institucións e dos centros de investigación implicados. Tamén forman parte do consorcio a UDC, Centro de Supercomputación de Galicia (CESGA), o Instituto Tecnolóxico para ou Control do Medio Mariño de Galicia (INTECMAR) e os centros propios da Consellería do Mar, o Centro de Investigacións Mariñas (CIMA) e o Instituto Galego de Formación en Acuicultura (IGAFA).
A xornada que se desenvolve en Compostela serve de marco para dar a coñecer os principais avances producidos nos 11 paquetes de traballo do programa. Xa en quenda de tarde, lévanse a cabo dous talleres participativos ao redor de ‘(Política de) Xestión de datos e a súa valoración no Programa de Ciencias Mariñas’ e ‘Acuicultura 2025-30; oportunidades de capitalización do Programa de Ciencias Mariñas’.
O programa está dotado con 10 millóns de euros, 6 procedentes do Ministerio de Ciencia e Innovación, con Fondos do Programa Next Generation EU e 4 da Xunta de Galicia a través do Fondo Europeo da Pesca e a Acuicultura. Andalucía, Cantabria, Comunitat Valenciana, Illas Canarias, Illes Balears e Murcia son outras comunidades autónomas que están a participar no desenvolvemento do Programa de Ciencias Mariñas no marco dos Plans Complementarios de I+D+i coas Comunidades Autónomas, que forma parte do Programa de Recuperación, Transformación e Resiliencia.