O Campus Terra da USC amosa a súa oferta formativa e o seu potencial a prol da economía circular no Tour do Talento
O Campus Terra da USC capitalizou este xoves as actividades do Tour do Talento 2023, un foro no que unha amplia representación de docentes e investigadores da sede universitaria luguesa amosaron ao estudandato preuniversitario e a todo o público interesado que se achegou á carpa instalada na luguesa Praza da Horta do Seminario, a oferta formativa da sede universitaria luguesa, ademais de exhibir o seu gran potencial a prol da economía verde e circular.
A instalación con postos informativos nos que os distintos centros do Campus de Lugo da USC facilitaron información ademais de asesoramento respecto dos estudos que imparten, así como do amplo abano de servizos dos que pode gozar o alumnado, comezou a recibir desde primeira hora da mañá grupos de estudantes de ensino medio que tiveron a oportunidade de coñecer de primeira man algunhas das singularidades que acubilla o Campus Terra.
Os docentes e investigadores da sede universitaria luguesa foron os encargados de captar a atención da rapazada, ben a través de sesións informativas sobre o contido das diversas titulacións, ben a través de pequenas sesións de experimentación ou material audiovisual. Ao atractivo das casetas expositivas cómpre sumar tamén o interese que espertaron os relatorios celebrados, nos que distintos egresados do Campus de Lugo da USC deron a coñecer ao público más novo as motivacións e as posibilidades laborais e profesionais que lles abriu a formación recibida na sede universitaria luguesa.
O vicerreitor de Organización Académica e Campus de Lugo, Francisco Fraga; a delegada do Reitor da USC para o Campus Terra, Elvira López Mosquera; así como os decanos e directores das facultades e escolas universitaria do Campus de Lugo, tomaron parte nunha penúltima xornada do Tour do Talento 2023, á que tamén se sumou a alcaldesa do Concello de Lugo, Lara Méndez, quen puxo en valor a condición de Lugo como cidade universitaria e o importante cometido que desenvolve a USC na súa contorna.
O programa de actividades continuou en quenda de tarde cunha sesión de monólogos científicos, a cargo de Eva Cabanelas, David García Dios e Uxía Yáñez Ramil.
