Salón de Actos
A xornada, a través da que se busca conectar o alumnado do grao en Robótica co tecido empresarial no que poden facer prácticas curriculares, desenvolverase o venres 29, a partir das 9.45 horas, no salón de actos da EPS de Enxeñaría
A Escola Politécnica Superior de Enxeñaría do Campus Terra da USC celebra este venres, día 29 de setembro, a partir das 9.45 horas, a primeira edición do Foro de Empresas do Grao en Robótica, un evento que citará no salón de actos do centro universitario lugués empresas como FINSA, Norvento, CadWorks, Himikode, Cofrico, Aeromedia, FabRx, BAÜP Solutions, Data Monitoring, HINDT e centros tecnolóxicos, tales como como CETIM e ITG.
O obxectivo da xornada é poñer en contacto ao alumnado coas empresas nas que poderán desenvolver as súas prácticas curriculares, a fin de que coñezan así de primeira man a actividade profesional ou de prestación de servizos que realizan.
O programa da xornada prolongarase en quenda de mañá e inclúe charlas curtas a cargo de representantes das empresas e dos centros tecnolóxicos participantes. Asemade, tamén haberá diversos postos informativos distribuídos nas instalacións do centro universitario e nos que o alumnado poderá interactuar con persoal das empresas.