Sesión ordinaria do Consello de Goberno

O Consello de Goberno da Universidade de Santiago reunirase este venres 3 en sesión ordinaria para tratar numerosos asuntos de interese, entre eles o límite de prazas de títulos de grao, mestrado e terceiro ciclo para o vindeiro curso 2017-2018.

No eido académico e organizativo, someterase a aprobación a Normativa de Planificación Académica Anual para o próximo curso, a viabilidade das declaracións de intencións de novos títulos de grao e mestrado para a súa implantación en 2018-2019, a revogación de títulos de mestrado ou o acordo das universidades públicas galegas sobre o procedemento de admisión aos estudos oficiais de grao.

Outras cuestións a tratar serán a proposta de nomeamento de tres novos doutores honoris causa, a convocatoria para a asignación de prazas na Escola Infantil Breogán da USC e de axudas para a escolarización dos menores de 3 anos no Campus de Lugo ou a aprobación do regulamento da USC das notificacións electrónicas obrigatorias.