Este venres 23 de febreiro celébrase o día de Rosalía de Castro, a máis destacada escritora moderna da literatura galega. Naceu o 23 de febreiro de 1837 no Camiño Novo, do que daquela era o concello de Conxo, hoxe Praza de Vigo do concello de Santiago de Compostela. Despois de vivir en Ortoño e Padrón volve ao redor de 1850 a vivir a Compostela.
En Santiago viviu, entre outros lugares, na Casa da Concha, sede do Consello Social da USC, e na praza da Universidade, no actual edificio que ocupa o Instituto da Lingua Galega. Na cidade comezou a formarse ao redor da Real Sociedad Económica de Amigos del País de la ciudad de Santiago. Recibiu formación musical, artística e literaria; participou nas actividades do Liceo de la Juventud, lugar de encontro dos intelectuais comprometidos co movemento provincialista como Eduardo Pondal, Aurelio Aguirre e Juan Manuel Paz Novoa.