O Campus Terra da USC e Gradiant definen este xoves en Silleda as estratexias de dixitalización do sector agroalimentario galego

O Polo de Innovación Dixital para o Sector Agroalimentario impulsado ao abeiro do Campus Terra da USC e o Centro Tecnolóxico de Telecomunicacións de Galicia (Gradiant) celebrará este xoves, a partir das 10.00 horas,noauditorio da Feira Internacional de Silleda unha nova sesión de traballo, no marco da que se desenvolverán tres obradoiros nos que profesionais e institucións do sector analizarán tanto as necesidades do eido agropecuario, como o rol agardado polas tecnoloxías dixitais e as súas principais eivas.

A xornada está dirixida a recoller contribucións de todos os axentes da cadea de valor e innovación no sector agroalimentario e no sector TIC, incluíndo a representantes de cooperativas e industrias, clústers e asociacións empresariais, membros de centros tecnolóxicos e grupos de investigación, representantes de empresas TIC, así como técnicos da administración pública involucrados na innovación do sector. Este foro botou a andar o 6 de outubro na Casa do Saber do Campus Terra da USC e celebrou a súa primeira reunión de traballo o pasado 15 de decembro en Santiago de Compostela, onde se estableceu un plan de traballo a curto prazo para deseñar unha estratexia conxunta para a dixitalización do sector agroalimentario en Galicia. Esta segunda xornada de traballo do Polo de Innovación Dixital para o Sector Agroalimentario terá lugar no marco de Gandagro 2017, o gran foro agropecuario de Galicia. O Campus Terra da USC contará neste evento cun espazo expositor onde poderá consultarse toda a oferta académica de grao, mestrado e doutoramento especializada na sostibilidade económica, social e medioambiental do uso da terra.