Catro entidades das principais familias da Economía Social galega presentan este mércores 6 de marzo o seu modelo empresarial na aula B da Facultade de Ciencias Económicas e Empresariais compostelá, no acto central da USC na V Semana Universitaria da Economía Social, que comeza ás 12.30 horas. Asisten Xaime López en representación Urdime S. Coop. Galega; Rubén da Silva de Ozono Multimedia SLL, Luís Penido López do Centro Especial de Emprego Trameve e Víctor Manuel Blanco de Primicias Raíña EIL da Asociación Raíña Paraíso, empresa de inserción laboral. A este acto asistirán tamén o vicerreitor de Transformación Dixital e Innovación da USC, Gumersindo Feijoo; a conselleira de Promoción do Emprego e Igualdade da Xunta de Galicia, Elena Rivo; o decano da Facultade, Xoán Doldán e a directora do Centro de Estudos Cooperativos de Galicia (CECOOP), Maite Cancelo, así como a vicepresidenta do Foro da Economía Social Galega, Carmen Rodríguez, que falará sobre o concepto de Economía Social.
Previamente, ás 12.00 horas inaugúrase na mesma Facultade de Económicas a exposición ‘Economía Social no corazón na nosa historia’, que mostra a través dos seus paneis a historia da Economía Social, un modelo diferente de facer empresa e país. Así mesmo, desde este luns 4 de marzo e ata o xoves 14 de marzo profesorado das facultades de Ciencias Económicas e Empresariais, Dereito e Relacións Laborais e do Grao en Intelixencia Artificial participarán en actividades baixo o lema ‘A Economía Social na Aula’. Docentes de varias materias dos graos de Economía, Administración e Dirección de Empresas, dobre grao de Dereito e Relacións Laborais e grao en Intelixencia Artificial abordarán o concepto e cuantificación da Economía Social galega desde o punto de vista da política económica, o dereito do traballo, o desenvolvemento económico e a sustentabilidade ou a econometría, incorporando de forma transversal estes conceptos nas clases interactivas das respectivas materias.
Completa o programa na USC a mostra bibliográfica ‘Construíndo xuntas a economía social: innovación feminina no cooperativismo’. Organizada pola Biblioteca da Facultade de Ciencias Económicas e Empresariais e con motivo do 8 de marzo e a Semana Universitaria da Economía Social, é unha mostra con libros impresos na entrada da biblioteca e unha mostra virtual que recolle máis documentación sobre cooperativismo feminino a través do catálogo da BUSC. En conxunto, na V Semana Universitaria da Economía Social, desenvolveranse 146 actividades en 33 universidades españolas e de Iberoamérica entre o 4 e o 14 de marzo; foi promovida polo Centro Internacional de Investigación e Información sobre a Economía Pública, Social e Cooperativa (CIRIEC-España), a través da Red ENUIES, de Centros e Institutos Universitarios de Investigación en Economía Social e da que forma parte o CECOOP da USC.