Entrega dos premios do II Concurso de Nadal da Asociación de Amigos do Museo de Historia Natural da USC

A Asociación de Amigos do Museo de Historia Natural da USC entrega este martes 21 os premios do II Concurso de Nadal nun acto que presidirá o reitor e presidente da asociación, Juan Viaño, ás 19.30 horas no propio museo. Asisten ademais a vicepresidenta e directora do Museo, Mª Isabel Fraga, o secretario Francisco Caamaño e o tesoureiro, Roberto Almuiña.

Ao certame presentáronse medio centenar de traballos, a maioría de rapaces e rapazas de entre 5 e 13 anos, cos legumes como temática por ser o pasado 2016 o Ano Internacional destes alimentos. O gañador da categoría dos máis novos foi Álvaro Manuel Limia de Paula, de 8 anos, polo seu traballo Os verdadeiros superheroes; na de 9 a 13 anos, María Armada Fontenla (11 anos) gañou con Breve historia dos legumes.

O premio para os de de 14 a 17 anos recaeu en Sandra Viadel Turjanicová por Legumbres con magia, e na de maiores de 18 o gañador foi Miguel Acón polo seu traballo Chakula power. Todos eles recibirán de premio unha cámara deportiva.

O xurado estivo formado pola xunta directiva da Asociación de Amigos do Museo de Historia Natural da USC: a vicepresidenta e directora do Museo, Mª Isabel Fraga; o tesoureiro, Roberto Almuiña Díaz; o secretario, Francisco Caamaño Isorna, e os vogais, Rosario García-Echave López, José Luis Veiga Goy, Adela Vázquez Vázquez, Manuel Sanmartín Durán e Felipe Bárcena Varela de Limia. Os gañadores elixíronse por votación secreta.